काठमाडौं । त्रिशूली नदीमा ५०औँ अन्तर्राष्ट्रिय ह्वाइटवाटर राफ्टिङ तथा कायकिङ महोत्सव तथा २४औँ हिमालय ह्वाइटवाटर च्यालेन्ज अयोजना गरिएको छ ।
नेपालको साहसिक तथा नदीमा आधारित पर्यटन प्रवर्द्धन गर्ने उद्देश्यले नेपाल पर्यटन बोर्ड र नेपाल एशोसियसन अफ राफ्टिङ एजेन्सिज (नारा)को संयुक्त आयोजनामा मंगलवारदेखी विहीवारसम्म महोत्सव तथा प्रतियोगिता संचालन गरिएको हो । नाराका पूर्वअध्यक्ष चन्द्र बहादुर दाहालले ५० वर्ष लामो इतिहास बोकेको यो महोत्सव नदी–आधारित पर्यटन प्रवर्द्धनको महत्वपूर्ण मञ्च बनेको उल्लेख गरे । उनले त्रिशूली नदीको बैरेनीदेखि नारायणगढसम्मको क्षेत्र संरक्षण गर्दै नदी पर्यटन नीति बनाउनुपर्नेमा जोड दिए । नेपाल पर्यटन बोर्डका वरिष्ठ निर्देशक हिक्मत सिंह ऐरले आगामी दिनमा अन्तर्राष्ट्रिय सहभागिता अझ बढाउनुपर्ने बताए । उनले नेपाललाई विश्वस्तरमा ह्वाइटवाटर सेलिङ तथा राफ्टिङ पर्यटन उत्पादनका रूपमा स्थापित गर्न संयुक्त प्रयास आवश्यक रहेको उल्लेख गरे । साथै त्रिशूली करिडोरमा प्रत्येक तीन–तीन महिनामा अन्तर्राष्ट्रिय कार्यक्रम आयोजना गरी काठमाडौंसँगै जोडिएको जल पर्यटनलाई विश्वस्तरमा प्रवद्र्धन गर्ने प्रतिबद्धता व्यक्त गरे ।
नेपाल पर्यटन बोर्डका उपाध्यक्ष राम प्रसाद सापकोटाले पर्यटन रोजगारी र देश विकासको महत्वपूर्ण आधार भएको उल्लेख गर्दै नेपाल साहसिक पर्यटनको हब बन्ने सम्भावना रहेको बताए । उनले राफ्टिङ क्षेत्रको विकासका लागि कानुनी व्यवस्था, सुरक्षा मापदण्ड र नदी संरक्षणमा विशेष ध्यान दिनुपर्ने धारणा राखे । साथै नदी उत्खनन, जलविद्युत् उत्पादन र राफ्टिङ गतिविधिलाई व्यवस्थित गर्न स्पष्ट वर्गीकरण आवश्यक रहेको उनले बताए । प्रतियोगितामा विभिन्न विधामा उत्कृष्ट प्रदर्शन गर्ने खेलाडीहरूले उपाधि जितेका छन् । कायक म्यान्डेटरी रन विधामा रविन्द्र चेपाङ प्रथम हुँदै एक लाख रुपैयाँ नगद पुरस्कार जित्न सफल भएका थिए । यसै विधामा डम्मर बहादुर पूर्वाछाने दोस्रो, जेसन गुरुङ तेस्रो र रविन गुरुङ चौथो भए । कायक स्प्रिन्ट विधामा जेसन गुरुङ प्रथम भए भने रविन्द्र चेपाङ दोस्रो, केशव घर्तीमगर तेस्रो र कृष्ण खड्का चौथो स्थानमा रहे । कायक क्रस प्रतिस्पर्धामा डम्मर बहादुर पूर्वाछाने प्रथम भए । यसै विधामा रविन्द्र चेपाङ दोस्रो, सुरेन्द्र चेपाङ तेस्रो र मोहन राना चौथो स्थान प्राप्त गरे । त्यसैगरी १० किलोमिटरको राफ्ट रेसमा प्याडल नेपाल पहिलो हुँदै ५० हजार रुपैयाँ नगद पुरस्कार जित्न सफल भयो । यस विधामा जलदेवी एड्भेन्चर दोस्रो, नेपाल कायक क्लब तेस्रो र राफ्टिङ एड्भेन्चर नेपाल चौथो भएका छन् । राफ्ट रेसमा कुल ११ टोली सहभागी थिए ।
कार्यक्रममा नेपालमा पहिलोपटक जल पर्यटन सुरुवात गर्ने हिमालयन एक्सप्लोरेसनलाई पनि विशेष सम्मान गरिएको छ । प्रतियोगिताको समापनमा नेपाल पर्यटन बोर्डका उपाध्यक्ष राम प्रसाद सापकोटा, बोर्डका वरिष्ठ निर्देशक हिक्मत सिंह ऐर, वरिष्ठ प्रबन्धक उदय भट्टराई, वरिष्ठ अधिकृत प्रदीप बस्नेत, नेपाल एशोसिएसन अफ राफ्टिङ एजेन्सिज (नारा) का अध्यक्ष कमल ठकुरी, पूर्वअध्यक्ष गंगाप्रसाद नेपाल, चन्द्र बहादुर दाहाललगायतको सहभागिता रहेको थियो ।
