वासिङटन । दक्षिण अफ्रिकाको ‘अमेरिका विरोधी’ एजेन्डाका कारण अमेरिका जी–२० वार्तामा सहभागी नहुने भएकोे छ । अमेरिकी विदेश मन्त्री मार्को रुबियोले दक्षिण अफ्रिकामा फेब्रअरी २० र २१मा आयोजना हुने जी–२० शिखर सम्मलेन बहिष्कार गर्ने घोषणा गरेका हुन् ।
रुबियोको यो घोषणा अमेरिकी राष्ट्रपति डोनाल्ड ट्रम्पले रङ्गभेद कालमा गरिएका असमानताहरू सच्याउन लक्षित भूमि सुधारलाई लिएर दक्षिण अफ्रिकाको आलोचना गरेको केही दिनपछि आएको हो । ट्रम्पको शैलीमा एक्समा पोस्ट गर्दै रुबियोले फेब्रुअरी २०–२१ मा जोहानेसबर्गमा हुने विदेशमन्त्रीहरूको जी–२० वार्ता बहिष्कार गर्ने बताएका हुन् ।
‘दक्षिण अफ्रिकाले धेरै नराम्रा कुराहरू गर्दैछ । निजी सम्पत्ति अधिग्रहण गर्दैछ । ‘एकता, समानता र दिगोपना’ बढावा दिन जी–२० प्रयोग गर्दैछ’, रुबियोले आफ्नो पोस्टमा लेखेका छन् ।
डिइआई वा विविधता, समानता र समावेशीकरणलाई गत महिना ह्वाइट हाउस फर्केपछि ट्रम्पले निरन्तर आक्रमण गरिरहेका छन् । ‘मेरो काम अमेरिकाको राष्ट्रिय हितलाई अगाडि बढाउनु हो, करदाताको पैसा खेर फाल्नु वा अमेरिकी विरोधलाई दमन गर्नु होइन’, उनले भने ।
दक्षिण अफ्रिकी विदेश मन्त्री रोनाल्ड लामोलाले बिहीबार रुबियोको दाबीलाई अस्वीकार गर्दै विज्ञप्तिमा नयाँ भूमि सुधार कानूनमा ‘भूमि/निजी सम्पत्तिको स्वेच्छिक विस्थापन छैन’ भनेका छन् । ‘यो कानुन प्रख्यात डोमेन कानुनहरूजस्तै छ’, उनले संघीय सरकारलाई सार्वजनिक प्रयोगका लागि सम्पत्ति अधिग्रहण गर्न अनुमति दिने लामो समयदेखिको अमेरिकी कानुनहरूको सन्दर्भमा भनेका छन् । लामोलाले दक्षिण अफ्रिका ‘मानव गरिमा, समानता र अधिकारका लागि प्रतिबद्ध एक सार्वभौम र लोकतान्त्रिक देश हो’, भनेका छन् ।
‘हाम्रो जी–२० को अध्यक्षता जलवायु परिवर्तनमा मात्र सीमित छैन तर ग्लोबल साउथका राष्ट्रहरूका लागि न्यायसङ्गत व्यवहार र सबैका लागि समान विश्व प्रणाली सुनिश्चित गर्ने पनि हो’, उनले भने ।
दक्षिण अफ्रिकी राष्ट्रपति सिरिल रामाफोसाले यस साताको सुरुमा दक्षिण अफ्रिकाले जमिन ‘जबरजस्ती खोस्दैछ’ भन्ने ट्रम्पका भनाइहरूलाई खारेज गर्नुभएको थियो र आफ्नो सरकारको भूमि सुधार नीति आफ्ना अमेरिकी समकक्षीलाई बुझाउन तयार रहेको बताए ।
मंगलबार रामाफोसाले दक्षिण अफ्रिकामा जन्मेका र विश्वकै धनी व्यक्ति ट्रम्पका नजिकका सहयोगी एलन मस्कसँग अमेरिकी राष्ट्रपतिद्वारा फैलाइएको ‘गलत सूचना’ बारे चिन्ता व्यक्त गरे ।
दक्षिण अफ्रिकामा भूमिको स्वामित्व एउटा विवादास्पद मुद्दा हो । यहाँ रङ्गभेदको अन्त्य भएको तीन दशकपछि पनि अधिकांश खेतीयोग्य जमिनहरू श्वेत मानिसहरूको स्वामित्वमा छन् । सुधारहरू लागू गर्न सरकारमाथि दबाब छ ।
विश्वको सबैभन्दा ठूलो अर्थतन्त्र संयुक्त राज्य अमेरिकाको अनुपस्थिति विश्वको सबैभन्दा ठूलो अर्थतन्त्रको प्रतिनिधित्व गर्ने जी–२० का लागि ठूलो धक्का हुनेछ । यो बैठकले रुबियोलाई आफ्ना रूसी समकक्षी विदेशमन्त्री सर्गेई लाभरोभलाई भेट्ने पहिलो अवसर प्रदान गर्न सक्थ्यो । ट्रम्पले युक्रेन युद्धमा कूटनीतिका लागि दबाब दिएका छन् ।
