अन्तरिम सरकारकी प्रधानमन्त्री सुशीला कार्कीसँग अभियन्ता तथा नागरिक बचाउ दलका संरक्षक दुर्गा प्रसाईंबीच औपचारिक भेटवार्ता बालुवाटारमा सुरु भएको छ।प्रसाईं नेतृत्वको समूहले सरकारले सम्बोधन गर्नुपर्ने भन्दै अघि सारेको २७ बुँदे मागपत्रका मुख्य मुद्दाहरूमा विस्तृत छलफल चलिरहेको नागरिक बचाउ दलका नेताहरूले बताएका छन्। वार्तामा प्रधानमन्त्री कार्कीसँगै गृहमन्त्री ओमप्रकाश अर्याल पनि सहभागी छन्। प्रसाईं पक्षबाट १९ जना प्रतिनिधि उपस्थित छन्।
राजनीतिक स्थितिमा ‘नयाँ मोड’ आउने संकेत
स्रोतका अनुसार यो भेटघाट राजनीतिक रूपमा बढ्दो तनावपूर्ण वातावरणलाई नयाँ मोड दिन सक्ने मानिएको छ।प्रधानमन्त्री कार्कीले समसामयिक राजनीतिक तथा सामाजिक विषयमा छलफल गर्न प्रसाईंलाई मंसिर २२ गते समय निर्धारण गरेकी थिइन्।
भेटमा प्रसाईंले सरकारले विगतमा गरेका प्रतिबद्धता कार्यान्वयन नभएको भन्दै असन्तुष्टि व्यक्त गरेका छन्। उनका अनुसार मागहरू सम्बोधन नभए उनीहरूले सुरु गरेको आन्दोलनलाई अझ सशक्त बनाइनेछ।प्रधानमन्त्रीको प्राथमिकता: शान्ति–सुरक्षा र राष्ट्रियतावार्तामा वर्तमान शान्ति–सुरक्षा अवस्था, राष्ट्रियता, र धार्मिक स्वतन्त्रता जस्ता मुद्दामा विशेष ध्यान केन्द्रित गरिएको बताइएको छ।
२७ बुँदे मागपत्रका मुख्य बुँदाहरू
प्रसाईं समूहले अघि सारेका मागहरू अत्यन्त व्यापक छन्। मुख्य बुँदाहरू यसप्रकार छन्—
वर्तमान संविधान खारेज गरी नयाँ संविधान निर्माण
प्रत्यक्ष निर्वाचित कार्यकारी प्रमुख प्रणाली
राजतन्त्र र हिन्दु राज्य पुनर्स्थापना
धर्मनिरपेक्षता हटाउने
विदेशी प्रभाव रोक्ने
सार्वजनिक शान्तिमा खलल पुर्याउने गतिविधि नियन्त्रण
नागरिक स्वतन्त्रताको सुनिश्चितता
यी मागहरू प्रसाईं समूहले मंसिर ६ गते गृहमन्त्री अर्याललाई बुझाएको थियो। सरकारको तर्फबाट यस्ता संरचनागत परिवर्तन निर्वाचन प्रक्रियाबाट मात्र सम्भव हुने सुझाव दिइएको थियो।
आन्दोलन थप कडा पार्ने चेतावनी
माग सम्बोधन नभए चरणबद्ध र तीव्र आन्दोलन गर्ने चेतावनी प्रसाईं समूहले पटक–पटक दोहोर्याइरहेको छ। वार्ताबाट कस्तो निष्कर्ष निस्कने हो भन्ने बारे राजनीतिक वृत्तको चासो बढेको छ।
