वासिङटन । अमेरिकी राष्ट्रपति डोनाल्ड ट्रम्पले शनिबार अमेरिकी तेल कम्पनीहरूले भेनेजुएलामा प्रवेश गरी त्यहाँका विशाल कच्चा तेल भण्डारको उपयोग गर्न पाउने बताएका छन् ।
एएफपीका अनुसार यो घोषणा अमेरिकी सैन्य कारबाहीपछि आएको हो, जसमा भेनेजुएलाका राष्ट्रपति निकोलस मादुरो र उनकी पत्नीलाई नियन्त्रणमा लिएर न्युयोर्क सहर लगिएको थियो ।
अमेरिकी सेनाले शनिबार बिहान काराकासमा हवाई आक्रमण सञ्चालन गरेको थियो । मादुरो दम्पतीलाई नियन्त्रणमा लिएर उनीहरूमाथि लागूऔषध तस्करी र हतियारसम्बन्धी मुद्दा चलाइएको छ ।
ट्रम्पले पत्रकार सम्मेलनमा भने, ‘विश्वकै ठूलो अमेरिकी तेल कम्पनीहरूले अरबौँ डलर लगानी गरी तेल पूर्वाधार सुधार गर्नेछन् र यसबाट देशका लागि आम्दानी सिर्जना हुनेछ । भेनेजुएलाको तेलमाथि लागू गरिएको प्रतिबन्ध पूर्णरूपमा कायम रहनेछ ।’
संयुक्त राज्य अमेरिकाले भेनेजुएलामा सन् २०१७मा आर्थिक प्रतिबन्ध र २०१९मा तेलमाथि प्रतिबन्ध लगाएको थियो । भेनेजुएला दैनिक १० लाखभन्दा कम ब्यारेल तेल उत्पादन गर्छ र यसको अधिकांश कालोबजारमा छुटमा बिक्री हुन्छ । ट्रम्पको भनाइअनुसार, भेनेजुएलाले तेल आम्दानी ‘ड्रग आतंकवाद, मानव तस्करी, हत्या र अपहरण’मा खर्च गर्दैछ ।
उनको दोस्रो कार्यकालको सुरुवातमा २०२५मा बहुर्राष्ट्रिय तेल कम्पनीहरूले भेनेजुएलामा सञ्चालन गर्ने अनुमति दिने लाइसेन्स समाप्त गरिएको थियो । यस क्रममा अमेरिकी कम्पनी चेभ्रोनलाई मात्र विशेष अनुमति दिइएको थियो । चेभ्रोन भेनेजुएलामा राज्य स्वामित्वको पीडीभीएसएसँग साझेदारीमा चार तेल क्षेत्र सञ्चालन गर्दै आएको छ । संयुक्त राज्यले प्रतिबन्धित ट्यांकरहरूको भेनेजुएलासँगको व्यापारमा पनि पूर्ण रोक लगाएको छ । अन्तर्राष्ट्रिय ऊर्जा एजेन्सी (आईएईए)का अनुसार भेनेजुएलामा विश्वका तेल भण्डारको करिब १७ प्रतिशत रहेको छ । तथापि, वर्षौँदेखि व्यवस्थापन र भ्रष्टाचारका कारण देश प्रमुख तेल उत्पादक बन्न सकेको छैन ।
