काठमाडौं । बौद्धस्थित समसामयिक कला केन्द्र तारागाउँ नेक्स्ट तीन महिनासम्मको मर्मत–सम्भारपछि पुनः सञ्चालनमा आएको छ । पुनः सञ्चालनसँगै संस्थाले आगामी महिनाहरूमा सञ्चालन हुने प्रदर्शनी, फिल्म प्रदर्शन, कार्यशाला तथा शैक्षिक कार्यक्रमहरूको विस्तृत तालिका सार्वजनिक गरेको छ ।
हाल तारागाउँ नेक्स्टमा जारी ‘आर्काइभिङ फर द फ्युचर’ शीर्षकको प्रदर्शनीमा समसामयिक कलामा अभिलेखन र स्मृतिको महत्वलाई उजागर गरिएको छ । यस प्रदर्शनीसँगै टर्कीका एक फिल्ममेकरसँग सम्बन्धित कार्यक्रम तथा स्पेनका कलाकारसँग संवाद कार्यक्रम पनि आयोजना भइरहेको छ । शैक्षिक पहुँच विस्तारका क्रममा तारागाउँ नेक्स्टले विद्यालयहरूका लागि अनुरोधका आधारमा सञ्चालन गर्न सकिने अनुभवात्मक सिकाइका ८ वटा कार्यशाला प्याकेज घोषणा गरेको छ । यसका अतिरिक्त, पारिस्थितिकी र कलामा केन्द्रित अन्वेषणात्मक कार्यक्रमहरू पनि प्रवेशका क्रममा अनुरोधअनुसार उपलब्ध गराइने जनाइएको छ । यी सबै कार्यक्रमका लागि दर्ता अनिवार्य रहेको छ भने थप विवरण तारागाउँ नेक्स्टको वेबसाइट तथा सामाजिक सञ्जालमार्फत उपलब्ध हुने जनाइएको छ ।
कला केन्द्रले सन् २०२६ को सुरुआतका लागि दुई प्रमुख प्रदर्शनीको घोषणा पनि गरेको छ । जनवरीमा ‘आर्टिस्ट इन स्टुडियो’ कार्यक्रमअन्तर्गत कलाकार सौरभ कोइरालाको प्रदर्शनी आयोजना हुनेछ । फालिएका कारका पार्टपुर्जा, पुराना क्यानलगायत सामग्री प्रयोग गरी जनावर र कीराका मूर्तिहरू निर्माणका लागि परिचित कोइरालाको प्रदर्शनी जनवरी १५, २०२६ मा उद्घाटन हुने जनाइएको छ । त्यसैगरी, स्पेनी कलाकार जोसेप पिनोलले जनवरी १६ मा कार्बन बजार र पारिस्थितिक विषयवस्तुमा केन्द्रित संवाद कार्यक्रम सञ्चालन गर्नेछन् । फेब्रुअरी २०२६ मा तारागाउँ नेक्स्टमा कलाकार संजीप महर्जनको मूर्तिकलालाई केन्द्रमा राखेर ‘अब्जेक्ट इन फोकस’ शीर्षकको प्रदर्शनी आयोजना हुनेछ । उक्त प्रदर्शनी तारागाउँ नेक्स्टका निर्देशक रोशन मिश्राले क्युरेट गरेका हुन् । फेब्रुअरीमै टर्कीका कलाकार तथा फिल्ममेकर मायिस रुकल पनि काठमाडौं आउनेछन् । उनले कार्यशाला, कलाकार संवाद तथा आफ्नो फिल्म ‘मुभमेन्ट सङ’को प्रदर्शनसमेत गर्ने कार्यक्रम रहेको छ ।
विविध कार्यक्रम र अन्तर्राष्ट्रिय सहकार्यसहित तारागाउँ नेक्स्टको पुनः सञ्चालनले काठमाडौंमा समसामयिक कला, शिक्षा तथा अन्तरसांस्कृतिक संवादलाई थप सुदृढ बनाउने अपेक्षा गरिएको छ ।
