काठमाडौं । प्रभु महालक्ष्मी लाइफ इन्स्योरेन्स लिमिटेडले बुढानीलकण्ठ मोडल कम्युनिटि एकेडेमीलाई विद्यालय संचालन गर्न आठ लाख २१ हजार दुई सय ५० रुपैयाँ सहयोग प्रदान गरेको छ । विद्यालयममा पठन पाठन कार्यलाई सहज बनाउन र विद्यार्थीको अध्ययन वातावरण बनाउनका लागि अत्यावश्यक फर्निचरका सामग्रीहरु खरिद गर्नका लागि बुढानीलकण्ठ मोडल कम्युनिटि एकेडेमीलाई प्रभु महालक्ष्मी लाइफ इन्स्योरेन्स लिमिटेड सो रकम सहयोग गरेको हो ।
शुक्रबार बुढानीलकण्ठ मोडल कम्युनिटि एकेडेमीको कार्यालयमा सम्पन्न कार्यक्रममा प्रभु महालक्ष्मी लाइफ इन्स्योरेन्सको तर्फबाट संचालक समितिका अध्यक्ष सम्झना अर्यालले बुढानीलकण्ठ मोडल कम्युनिटि एकेडेमीका प्रधानाध्यापक मोहन प्रसाद भट्टलाई आठ लाख २१ हजार दुई सय ५० रुपैयाँको चेक हस्तान्तरण गरेकी हुन् । चेक हस्तान्तरणपछि कार्यक्रमलाई सम्बोधन गर्दै प्रभु महालक्ष्मी लाइफ इन्स्योरेन्सको संचालक समितिका अध्यक्ष अर्यालले विशुद्ध सामाजिक कार्य गर्ने संस्थाहरुलाई कम्पनीले सहयोग गर्न पाउँदा खुसी व्यक्त गरिन । कम्पनीले अति आवश्यक क्षेत्रको पहिचान गरी संस्थागत सामाजिक उत्तरदायित्वअन्तर्गत सहयोग र सामाजिक कार्य गर्दै आइरहेको र आगामी दिनमा पनि निरन्तरता दिने प्रतिवद्धता व्यक्त गरिन् । त्यसैगरी बुढानीलकण्ठ मोडल कम्युनिटि एकेडेमीका प्रधानाध्यापक भट्टले यस सामुदायीक विद्यालयका विद्यार्थीहरुको पठन पाठनलाई सहज र स्तरीय बनाउन प्रभु महालक्ष्मी लाइफ इन्स्योरेन्सको उल्लेखनिय रहेकोमा धन्यवाद व्यक्त गरे ।
कार्यक्रममा प्रभु महालक्ष्मी लाइफ इन्स्योरेन्सको संचालक समिति सदस्यहरु भावना बलायर, विरेन्द्रजंग पाण्डे, प्रमुख कार्यकारी अधिकृत सन्तोष प्रसाइँ, नायब प्रमुख कार्यकारी अधिकृत किशोर प्रसाद लामिछाने, ब्रान्डिङ विभाग प्रमुख विनोद घिमिरे एवं बुढानीलकण्ठ मोडल कम्युनिटि एकेडेमीका तर्फबाट सहायक प्रधानाध्यापक अनिता लामा, शिक्षकहरु र विद्यालय व्यवस्थापन समितिका सदस्यहरु लगायतको उपस्थिति रहेको थियो ।
