काठमाडौं । माछापुच्छ्रे क्यापिटल लिमिटेडले वृद्धाश्रमलाई हिटर तथा खाद्यान्र सहयोग गरेको छ । कम्पनीले आफ्नो ५औँ वार्षिकोत्सवको अवसरमा संस्थागत सामाजिक उत्तरदायित्वअन्तर्गत विभिन्न कार्यक्रमहरू सञ्चालन गर्ने योजनाअनुरूप, शुक्रबार चण्डेश्वरी मार्ग, बोडे, भक्तपुरस्थित ‘श्री द्योमाँ जगत वृद्धाश्रम’मा आश्रित वृद्धवृद्धाहरूको स्वास्थ्य तथा जाडो महिनालाई मध्यनजर गर्दै सहयोगस्वरूप छ थान हिटर, तथा खाद्यान्न सामग्रीहरू वितरण गरेको हो । यो कार्यक्रममा वृद्धाश्रमका तर्फबाट वृद्धाश्रम समितिका अध्यक्ष प्रेम चद्र अदुवा श्रेष्ठ तथा मध्यपुर ठिमी नगरपालिका वडा नं ८ का वडा अध्यक्ष रमेश थापा श्रेष्ठ उपस्थित भएका थिए भने क्यापिटलका तर्फबाट अध्यक्ष विश्वम्भर न्यौपाने, तथा प्रमुख कार्यकारी अधिकृत उपेन्द्र मालाकारका साथै कर्मचारीहरू उपस्थित भएका थिए ।
माछापुच्छ्रे क्यापिटल लिमिटेडले संस्थागत सामाजिक उत्तरदायित्वअन्तर्गत विभिन्न कार्यक्रमहरू गर्दै आएको छ । यसै सन्दर्भमा आफ्नो स्थापनाको पाँचौँ वार्षिकोत्सवको अवसरमा क्यापिटलले आफ्नो स्थापनाको ५औँ वर्षको वार्षिकोत्सव माघ महिनाभर रक्तदान, वित्तीय साक्षरता, सामाजिक उत्तरदायित्वअन्तर्गत विभिन्न सहयोगलगायतका विविध कार्यक्रमहरू आयोजना गरी भव्यताका साथ मनाइरहेको छ ।
माछापुच्छ्रे क्यापिटल लिमिटेड, माछापुच्छ्रे बैंक लिमिटेडको सहायक कम्पनी हो । पब्लिक लिमिटेड कम्पनीको रुपमा स्थापित धितोपत्र व्यवसायी (मर्चेन्ट बैंकर) कम्पनी, माछापुच्छ्रे क्यापिटल लिमिटेडले नेपाल धितोपत्र बोर्डमार्फत धितोपत्र प्रत्याभूति, लगानी व्यवस्थापन, संस्थागत परामर्श सेवा, निक्षेप सदस्य, सामूहिक लगानी कोषको सेवा प्रदान गरिरहेको छ ।
