काठमाडौं । बैंक तथा वित्तीय संस्था परिसंघ नेपाल (सीबीफिन)ले ‘दिगो, दर्बिलो र वास्तविक अर्थतन्त्रको निर्माणका लागि मौद्रिक नीतिले स्पष्ट मार्गचित्र कोरेको धारणा व्यक्त गरेको छ । राष्ट्र बैंकले शुक्रबार जारी गरेको आर्थिक वर्ष २०८२/८३को मौद्रिक नीतिको बारेमा आफ्नो आधिकारिक धारणा सार्वजनिक गर्दै संघले मुलुकको आर्थिक एवं वित्तीय क्षेत्रहरूको अवस्था, निजी क्षेत्रको मनस्थिति एवं अपेक्षा र विश्व परिवेशको वस्तुनिष्ठ अध्ययन, मूल्यांकन, विश्लेषण गर्दै नेपाल राष्ट्र बैंकले आव २०८२/८३को लागि जारी गरेको मौद्रिक नीतिको स्वागत गरेको हो ।
संघले विज्ञप्तिमार्फत भनेको छ, लामो समयदेखि मुलुकको अर्थतन्त्र सुषुप्त अवस्थामा रही आर्थिक एवं बैंकिङ क्रियाकलापहरूले गति लिन नसकिरहेको विद्यामान अवस्थामा निकै चासोपूर्वक प्रतीक्षा गरिएको यस मौद्रिक नीतिमा नीतिगत अंकुशभन्दा अनुगमन र सुपरीवेक्षणलाई बढवा दिने गरी अवलम्बन गरिएका सन्तुलित, समयसापेक्ष र उदार, नीतिहरूले बैंकिङ क्षेत्रमा खस्किरहेको मनोबल र आत्मविश्वासलाई उकासेको छ भने आर्थिक एवं बैंकिङ गतिविधिहरूलाई जीवन्त बनाई दिगो, दर्बिलो र वास्तविक अर्थतन्त्रको निर्माणमा अग्रसर हुने स्पष्ट मार्गचित्र कोरेको छ ।
बैंक तथा वित्तीय संस्थाहरूले पुँजीकोषमा दबाब झेलिरहनु परेको विद्यमान अवस्थामा कर्जा लगानी क्षमता बढाउने, कर्जा व्यवस्थापनलाई सहज बनाउने र पुँजीकोष सुदृढ बनाई वित्तीय स्थायित्व कायम गर्ने कार्यलाई प्राथमिकता राख्नु र बैंकदर तथा नीतिगत दर घटाइनुले कर्जा विस्तारमा सहजता ल्याई मौद्रिक नीतिले लिएको कर्जा विस्तारको लक्ष्य सहजरुपमा प्राप्त हुने सकारात्मक संकेत देखिएको संघको भनाइ छ । निष्क्रिय÷खराब कर्जासहित गैरबैंकिङ सम्पत्ति बढ्दै गएको अवस्थामा सम्पत्ति व्यवस्थापन कम्पनीको स्थापनाका लागि तत्काल आवश्यक ऐन र नियमको मस्यौदा तर्जुमा गर्ने, बजार चलायमान बनाउनका लागि आवासीय घरकर्जा र सेयर धितो मार्जिनकर्जाको सीमा वृद्धि, चालू पुँजी कर्जासम्बन्धी मार्गदर्शनलाई कर्जा भुक्तानी–आम्दानी चक्रको आधारमा आवश्यकताअनुसार परिमार्जन गर्ने, विद्यमान कर्जाको वर्गीकरण तथा कर्जा नोक्सानी व्यवस्था अध्ययन गरी आवश्यकतानुसार पुनरावलोकन गर्ने, कृषि तथा लघु, घरेलु, साना र मझौला व्यवसायमा कर्जा सहजीकरणमा पुनरावलोकन गर्ने, सम्पत्ति शुद्धीकरण निवारणका रणनीति तथा कार्ययोजनाको पूर्ण कार्यान्वयनका गरिनेसहितका अन्य महत्वपूर्ण सुधारमुखी व्यवस्थाहरू र ‘ऋणीसँग नेपाल राष्ट्र बैंक’ जस्तो चेतनामूलक एवं सेवाग्राहीमैत्री कार्यक्रमको व्यावहारिक कार्यान्वयनले आर्थिक एवं बैंकिङ क्षेत्रको दिगो विकाससहित सुदृढ, दिगो र वास्तविक अर्थतन्त्रको निर्माणको जग बसाल्ने सीबीफिनले विश्वास लिएको परिसंघले जनाएको छ ।
लगानी प्रवर्द्धन तथा विस्तार, उत्पादनमूलक, रोजगारमूलक र निर्यातमूलक क्षेत्रको विकास, युवा जनशक्तिको परिचालन तथा उपयोग, उत्पादकत्व अभिवृद्धि, नवउद्यमशीलता एवं नवप्रवर्तनको विकास, रोजगारी सिर्जना, नेपाली वस्तु तथा सेवाको उपभोग तथा निर्यात प्रवर्द्धन, हरित लगानीजस्ता विषयमा केन्द्रित रहेर दिगो बैंकिङ विकाससहित वास्तविक अर्थतन्त्रको निर्माणमा अग्रसर हुनका लागि मुलुकको धरातलीय यथार्थको अध्ययन–अनुसन्धानसहित वर्तमान आवश्यकता, औचित्यता र अपेक्षाहरूमा केन्द्रित रही सीबीफिनले बुझाएका तर जारी मौद्रिक नीतिमा समेटिन नसकेका कतिपय महत्वपूर्ण सुझावहरू आगामी निर्देशन र समीक्षामार्फत क्रमशः सम्बोधन हुँदै जाने विश्वाससहित मौद्रिक नीतिले अंगिकार गरेका नीतिहरूको प्रभावकारी एवं नतिजामूलक कार्यान्वयनमा सीबीफिन सदैव निकट सहयोगी बनेर सहकार्य र सहयोग गर्ने प्रतिबद्धता समेत व्यक्त गर्दछ । परिसंघले विज्ञप्तिमार्फत भनेको छ ।
