वासिङटन । अमेरिकी राष्ट्रपति डोनाल्ड ट्रम्पको आदेशको अवज्ञा गर्न अमेरिकी सैनिकहरूलाई खुलेर आह्वान गरेका कोलम्बियाका राष्ट्रपति गुस्ताभो पेट्रोको भिसा रद्द गर्ने निर्णय अमेरिकी विदेश मन्त्रालयले गरेको छ । यस कदमपछि अमेरिका–कोलम्बिया सम्बन्धमा थप तनाव आएको छ ।
विदेश मन्त्रालयले सामाजिक सञ्जालमार्फत विज्ञप्ति जारी गर्दै भनेको छ, ‘राष्ट्रपति पेट्रोको लापरवाह र भड्काउने गतिविधिका कारण उहाँको भिसा रद्द गरिएको हो ।’ राष्ट्रपति पेट्रो संयुक्त राष्ट्र महासभाको वार्षिक अधिवेशनका लागि न्युयोर्कमा रहँदा गाजामा जारी युद्धविरुद्ध भएको विरोध प्रदर्शनमा सहभागी भएका थिए । त्यस क्रममा उनले भनेका थिए, ‘म संयुक्त राज्य अमेरिकाका सैनिकहरूलाई भन्छु, मानवताविरुद्ध आफ्नो राइफल नउठाउनुहोस्, ट्रम्पका आदेशहरूको अवज्ञा गर्नुहोस् ।’
यस घोषणापछि राष्ट्रपति पेट्रो शनिबार कोलम्बिया फर्किएका थिए । तर, अमेरिकी कदमले उनको भविष्यका भ्रमणहरूमा प्रभाव पार्ने वा नपार्ने भन्ने विषयमा विदेश मन्त्रालय मौन छ । ‘यो सजायले मलाई फरक पार्दैन, किनभने म युरोपेली नागरिक पनि हुँ, जसलाई अमेरिकामा प्रवेशका लागि भिसा आवश्यक पर्दैन’, कडा, प्रायः वैचारिक भाषणका लागि चिनिनु भएका राष्ट्रपति पेट्रोले सामाजिक सञ्जालमा प्रतिक्रिया दिँदै भने, ‘मानवता विश्वभर स्वतन्त्र हुनुपर्छ ।’
विशेषगरी लागुऔषध तस्करीविरुद्धको लडाइँमा कोलम्बिया लामो समयदेखि अमेरिकाको नजिक सहयोगी मानिँदै आएको छ । तर, वामपन्थी तथा पूर्व विद्रोही नेता पेट्रो र ट्रम्प प्रशासनबीच बारम्बार मतभेद देखिँदै आएको छ । यसअघि वर्षको सुरुमा राष्ट्रपति पेट्रोले अमेरिकी सैन्य विमान प्रयोग गरी निर्वासन उडानहरू सञ्चालन गर्ने कदमको विरोध गरेका थिए । यस घटनाले कूटनीतिक तनाव निम्त्याएको थियो । त्यसपछि राष्ट्रपति ट्रम्पले उच्च भन्सार शुल्क र भिसा निलम्बनसहित कडा कदम चाल्ने चेतावनी दिएका थिए ।
अमेरिका कोलम्बियाको सबैभन्दा ठूलो व्यापारिक साझेदार हो । त्यही कारण राष्ट्रपति पेट्रोको सरकारले अन्ततः ती विमानहरू स्वीकार गर्ने निर्णय लिएको थियो । तर, यस महिनाको सुरुमा अमेरिकाले कोलम्बियालाई लागुऔषध नियन्त्रणका प्रयासमा असफल भएको भन्दै आलोचना गरेको थियो ।
राष्ट्रपति पेट्रोले जवाफमा भने, ‘हाम्रो देशले कोकेनलाई संयुक्त राज्य अमेरिका पुग्न नदिन अनगिन्ती प्रहरी, सैनिक र सामान्य नागरिकहरूको ज्यान गुमाएको छ ।’ रासस/एपी
