काठमाडौँ । माछापुच्छ्रे क्यापिटल लिमिटेड तथा पिस इनर्जी कम्पनी लिमिटेडबीच सम्झौता भएको छ । पिस इनर्जी कम्पनी लिमिटेडको प्राथमिक सेयर निष्कासनका लागि संस्थागत परामर्श सेवाका साथै निष्कासन तथा बिक्री प्रबन्ध सेवा प्रदान गर्ने विषयमा सोमबार उक्त सम्झौता पत्रमा हस्ताक्षर भएको हो ।
पिस इनर्जी कम्पनी लिमिटेडले जारी पुँजीको २० प्रतिशत अर्थात् ३२ लाख कित्ता साधारण सेयर सर्वसाधारणमा जारी गर्नका लागि माछापुच्छ्र्रे क्यापिटल लिमिटेडलाई संस्थागत परामर्श सेवाका साथै निष्कासन तथा बिक्री प्रबन्धकको रूपमा नियुक्त गरिएको हो । सम्झौता समारोहमा धितोपत्र निष्कासन तथा बिक्री प्रबन्धक संस्था माछापुच्छ्रे« क्यापिटल लिमिटेडको तर्फबाट प्रमुख कार्यकारी अधिकृत उपेन्द्र मालाकार र निष्कासनकर्ता कम्पनी पिस इनर्जी कम्पनी लिमिटेडको तर्फबाट कार्यकारी अध्यक्ष डा. मदन कुमार उप्रेतीद्वारा सम्झौता पत्रमा हस्ताक्षर गरेका हुन् ।
पिस इनर्जी कम्पनी लिमिटेडले ताप्लेजुङ जिल्लाको सिरिजङ्घा गाउँपालिका भएर बग्ने कावेली खोलाको पानीको बहाव सदुपयोग गरी २८.१ मेगावाट क्षमताको माथिल्लो कावेली जलविद्युत् आयोजना निर्माण गरिरहेको छ । यस जलविद्युत् आयोजनाको भौतिक कार्य प्रगति हालसम्म ६१ प्रतिशतभन्दा माथि भइसकेको छ र मिति २०८३ कार्तिक १४ सम्म निमार्ण सम्पन्न गरी राष्ट्रिय प्रसारण लाइनमा जोडिने लक्ष्य राखेको छ ।
माछापुच्छ्रे क्यापिटल लिमिटेड, माछापुच्छ्रे बैंक लिमिटेडको सहायक कम्पनी हो । पब्लीक लिमिटेड कम्पनीको रूपमा स्थापित धितोपत्र व्यवसायी (मर्चेन्ट बैंकर) कम्पनी, माछापुच्छ्रे क्यापिटल लिमिटेडले नेपाल धितोपत्र बोर्डमार्फत धितोपत्र प्रत्याभूति, लगानी व्यवस्थापन, संस्थागत परामर्श सेवा, निक्षेप सदस्य, निष्कासन तथा बिक्री प्रबन्धक, सेयर रजिस्ट्रार तथा सामूहिक लगानी कोष सेवा प्रदान गर्दैै आइरहेको छ ।
