काठमाडौं । अन्नपूर्ण माछा दाना उद्योग लिमिटेडले साधारण सेयर (आईपीओ) जारी गर्ने भएको छ । कम्पनीले सर्वसाधारणका लागि एक सय रुपैयाँ अंकित मूल्य कायम रहने गरी १० करोड नौ लाख ५३ हजार एक सय रुपैयाँ बराबरको १० लाख नौ हजार पाँच सय ३१ कित्ता साधारण सेयर जारी गर्ने तयारी गरेको हो ।
साधारण सेयर जारी गर्नको लागि कम्पनीले सेयर निष्कासन तथा बिक्री प्रबन्धकमा लक्ष्मी सन्राइज क्यापिटल लिमिटेडलाई नियुक्त गरेकोे छ । उक्त सेयर निष्कासन सम्बन्धी सम्झौतामा अन्नपूर्ण माछा दाना उद्योग लिमिटेडको तर्फबाट प्रमुख कार्यकारी अधिकृत यश पुरी तथा लक्ष्मी सन्राइज क्यापिटल लिमिटेडका तर्फबाट प्रमुख कार्यकारी अधिकृत विजय लाल श्रेष्ठले हस्ताक्षर गरेका छन् ।
अन्नपूर्ण माछा दाना उद्योग लिमिटेड नेपालको अग्रणी माछा दाना उत्पादन गर्ने उद्योग मध्ये एक हो, जसले युरोपेली प्रविधिमा आधारित आधुनिक उत्पादन प्रणाली प्रयोग गरी उच्च गुणस्तरका, पोषणयुक्त तथा अन्तराष्ट्रिय मापदण्ड अनुरुपका माछा दाना उत्पादन गर्दै आएको छ । कम्पनीले देशभर फैलिएको सशक्त वितरण अञ्जालमार्फत नेपालका सबै प्रदेशमा रहेका मत्स्य कृषकहरूलाई आफ्ना उत्पादनहरू आपूर्ति गर्नका साथै प्राविधिक परामर्श र किसानमैत्री सेवा प्रदान गर्दै नेपालको मत्स्य क्षेत्रको दिगो विकासमा योगदान पु¥याउँदै आएको छ । नेपालका अग्रणी लगानी संस्था टिम भेन्टर्सले दाना उत्पादनमा केन्द्रित कृषि–प्रशोधन कम्पनी अन्नपूर्ण माछा दाना उद्योग लिमिटेडमा रणनीतिक संस्थागत लगानी गरेको छ । टिम भेञ्र्चस तथा यसको सम्बद्ध साझेदारहरूले संयुक्त रूपमा २१६.८ रुपैयाँ मिलियन लगानी गरेका हुन्, जसले अन्नपूर्ण माछा दाना उद्योग लिमिटेडमा पहिलोपटक संस्थागत पुँजी प्रवेश गराएको छ । उक्त लगानीले आर्थिक तथा सामाजिक प्रभाव सिर्जना गर्ने स्वदेशी कृषि उद्योगलाई समर्थन गर्ने टिम भेञ्र्चसको प्रतिबद्धता दर्शाउँछ । टिम भेञ्र्चसका प्रमुख लगानी अधिकृत विकास चन्द्र भण्डारीले एएमडीयूलाई दिगो दाना उत्पादनमा राष्ट्रिय स्तरको अग्रणी कम्पनी बन्ने उच्च सम्भावना रहेको बताए । एएमडीयूका प्रमुख कार्यकारी अधिकृत यश पुरीले संस्थागत समर्थनले कम्पनीको विस्तार, सुशासन सुदृढीकरण र आयात निर्भरता घटाउने लक्ष्यलाई गति दिने बताए । यस संस्थागत सहकार्यले एएमडीयूको आईपीओतर्फको यात्रालाई संरचित र सुदृढ बनाउँदै सार्वजनिक बजार प्रवेशको तयारीमा महत्वपूर्ण भूमिका खेलेको कम्पनीले जनाएको छ ।
