काठमाडौँ । बैंकिङ क्षेत्रको वासलातमा सुधारको संकेत देखिएको छ । पछिल्लो समय कर्जामा संकुचन आइरहे पनि बैंक तथा फाइनान्स कम्पनीहरूबाट सार्वजनिक चालू आर्थिक वर्षको दोस्रो त्रैमासिक अपरिष्कृत वित्तीय विवरणले वासलातमा सुधार देखिएको हो ।
लघुवित्त वित्तीय संस्थाबाहेक बैंकिङ क्षेत्रमा हाल २० वटा वाणिज्य बैंक, क्षेत्रीय तथा राष्ट्रियस्तरका समेत गरी १७ वटा विकास बैंक र १७ वटा फाइनान्स कम्पनीसहितका ५४ संस्था सञ्चालनमा छन् । तीमध्ये हालसम्म छवटा वाणिज्य बैंक, चारवटा विकास बैंक र एउटा फाइनान्स कम्पनीले विवरण सार्वजनिक गर्दा एकाधबाहेक सबैजसोको नाफा बढेको छ ।
अपरिष्कृत वित्तीय विवरणअनुुसार यो अवधिमा नेपाल बैंकले एक अर्ब ३० करोड ४८ लाख ५२ हजार रुपैयाँ खुद मुनाफा कमाएको छ । यो नाफा गत आवको सोही अवधिको तुलनामा निकै बढी हो । गत आवको सोही अवधिमा बैंकको यस्तो नाफा ४६ करोड १० लाख १७ हजार रुपैयाँ रहेको थियो । त्यसैगरी प्रभु बैंकले पनि पुससम्म एक अर्ब एक करोड ४४ लाख ५७ हजार रुपैयाँ खुद मुनाफा कमाएको छ । यो नाफा गत आवको सोही अवधिको तुलनामा केही कम हो । गत आवको सोही अवधिमा बैंकले एक अर्ब ३३ करोड ६१ लाख ३८ हजार रुपैयाँ खुद मुनाफा कमाएको थियो ।
उक्त अवधिमा एक अर्ब एक करोड ११ लाख ७३ हजार रुपैयाँ खुद मुनाफा कमाएको माछापुच्छ्रे बैंकले पनि वासलातमा सुधार गरेको छ । गत वर्ष यही अवधिमा बैंकले ८० करोड ७३ लाख २७ हजार नाफा गरेको थियो । यता सिटिजन्स बैंक इन्टरनेसनल लिमिटेडले दोस्रो त्रैमासमा ३५ करोड ८८ लाख ५८ हजार रुपैयाँ खुद मुनाफा कमाएको छ । गत आवमा यस्तो नाफा ६६ करोड १८ लाख २८ हजार थियो । अपरिष्कृत वित्तीय विवरणअनुसार एभरेष्ट बैंकले पनि चालू आवको दोस्रो त्रैमासमा दुई अर्ब ११ करोड ७१ लाख १६ हजार रुपैयाँ खुद मुनाफा कमाएको छ । गत आवको सोही अवधिमा बैंकको यस्तो नाफा दुई अर्ब सात करोड ४७ लाख ६३ हजार रुपैयाँ रहेको थियो । नेपाल इन्भेष्टमेन्ट मेगा बैंकले पनि चालू आवको दोस्रो त्रैमासमा एक अर्ब ६१ करोड ३० लाख ३४ हजार रुपैयाँ खुद मुनाफा कमाएको छ । गत आवको सोही अवधिमा बैंकको यस्तो नाफा दुई अर्ब ८३ करोड २३ लाख २६ हजार रुपैयाँ रहेको थियो ।
विकास बैंकतर्फ भने चालू आवको दोस्रो त्रैमासमा कामना सेवा विकास बैंकले ३९ करोड ४५ लाख ५० हजार रुपैयाँ खुद मुनाफा कमाएको छ । गत आवको सोही अवधिमा उक्त बैंकको यस्तो नाफा ३२ करोड २४ लाख ९३ हजार रुपैयाँ रहेको थियो । साँग्रिला डेभलपमेन्ट बैंकले पनि चालू आवको दोस्रो त्रैमासमा ३० करोड २५ लाख ९७ हजार रुपैयाँ खुद मुनाफा कमाएको छ । गत आवको सोही अवधिमा बैंकको यस्तो नाफा १९ करोड ६५ लाख ६१ हजार रुपैयाँ रहेको थियो ।
क्षेत्रियस्तरको सिन्धु र सालपा विकास बैंकले भने चालू आवको दोस्रो त्रैमासमा क्रमशः एक करोड ५४ लाख ६८ हजार र एक करोड चार लाख एक हजार रुपैयाँ खुद नोक्सानी बेहोरेका छन् । गत आवको सोही अवधिमा सिन्धुले चार करोड ८७ लाख चार हजार रुपैयाँ खुद मुनाफा कमाएको थियो भने सालपाले १३ लाख ९२ हजार रुपैयाँ खुद नोक्सानी बेहोरेको थियो ।
फाइनान्स कम्पनीतर्फ भने हालसम्म मञ्जुश्री फाइनान्सले मात्र चालू आवको दोस्रो त्रैमासिक अपरिष्कृत वित्तीय विवरण सार्वजनिक गरेको छ । फाइनान्सले यस अवधिमा १३ करोड ५३ लाख ७८ हजार रुपैयाँ खुद मुनाफा कमाएको छ । गत आवको सोही अवधिमा फाइनान्सको यस्तो नाफा ११ करोड ७० लाख ७९ हजार रुपैयाँ रहेको थियो ।
