काठमाडौं । निर्वाचन आयोगले निर्वाचन खर्च बैकिङ प्रणालीमार्फत मात्रै गर्नुपर्ने व्यवस्था गरेको भए पनि एक तिहाई उम्मेदवारले अझै बैंक खाता खोलेका छैनन् ।
बिहीबार प्रतिनिधिसभा सदस्यको निर्वाचन हुँदैछ । तर प्रतिनिधिसभा सदस्य निर्वाचनमा उम्मेदवारी दर्ता गराएका तीन हजार ४०६ प्रत्यक्ष उम्मेदवारमध्ये एक हजार ९८६ जना उम्मेदवारले मात्र बैंक खाता खोलेका हुन् । मतदानको दिन आइसक्दा समेत एक तिहाइ उम्मेदवारले खाता खोल्न बाँकी छ भने निर्वाचनमा भाग लिएका ६५ दलमध्ये ११ दलले मात्र खाता खोलेका छन् । बैंक खाता खोल्ने दलहरूमा नेपाली कांग्रेस, राष्ट्रिय जनमोर्चा, नेकपा संयुक्त, नेपाली कम्युनिष्ट पार्टी (नेकपा), नेपालका लागि नेपाली पार्टी, जनता समाजवादी पार्टी (जसपा), संयुक्त नागरिक पार्टी, मितेरी पार्टी, नेपाल जनता संरक्षण पार्टी, नेपाल मजदुर किसान पार्टी र राष्ट्रिय जनमुक्ति पार्टी रहेको आयोगका सहायक प्रवक्ता सीता पुन श्रीसले जानकारी दिइन् ।
निर्वाचनमा राजनीतिक दल र उम्मेदवारहरूले लिने आर्थिक सहायताको पारदर्शिता र निर्वाचन कानुनले तोकेको खर्चको सीमाको पालना तथा प्रभावकारी निगरानीका लागि बैंक खाता खोल्ने व्यवस्था गरिएको छ । प्रतिनिधिसभा सदस्य निर्वाचन प्रचारप्रसार बैंक खाता (सञ्चालन तथा व्यवस्थापन) कार्यविधि, २०८२ अनुसार प्रतिनिधिसभा सदस्य निर्वाचन, २०८२ मा भाग लिने प्रयोजनका लागि आयोगमा दर्ता भई समानुपातिक र पहिलो हुने निर्वाचित हुने निर्वाचन प्रणालीका लागि उम्मेदवारी दिएका सबै राजनीतिक दल, दलका उम्मेदवारहरू र स्वतन्त्र उम्मेदवारहरूले समेत कार्यविधि अनुसार निर्वाचन प्रचारप्रसारका लागि आर्थिक सहयोग लिई गर्ने आम्दानी खर्च कारोबार सोही खातामार्फत हुने व्यवस्था गरिएको छ । यही व्यवस्थाअनुसार दल र उम्मेदवारले खाता खोलेका हुन् । तर अधिकांश राजनितिक दल र एक तिहाई उम्मेद्वारहरूले खाता खोलेनन् । आयोगले २५ हजार रुपैयाँभन्दा माथिको आर्थिक गतिविधि गर्दा अनिवार्य रूपमा बैंक खातामार्फत गर्न निर्देशन दिएको थियो । निर्वाचनको दिन आउन एक दिन मात्रै बाँकी रहेकोले अब उम्मेदवार तथा राजनितिक दलहरूले बैंक खाता खोल्ने छैनन् । सरकारले निर्वाचनको लागि बुधबारदेखि नै सार्वजानिक विदासमेत दिएको छ ।
