काठमाडौं । ग्लोबल टेक कम्पनी याङ्गो ग्रुपअन्तर्गतको राइड–हेलिङ सेवा याङ्गो राइडले च्याट जीपीटीभित्रै यात्रा योजना र राइड बुकिङ गर्न सकिने नयाँ सुविधा सार्वजनिक गरेको छ ।
यो अपडेट कम्पनीले सञ्चालन गर्ने २५ भन्दा बढी देशहरूमा विस्तार गरिएको छ, यसले मध्यपूर्व, दक्षिण एशिया, अफ्रिका तथा ल्याटिन अमेरिकासम्मका प्रयोगकर्तालाई समेट्ने कम्पनीको भनाई छ । नयाँ एकीकरणमार्फत प्रयोगकर्ताले च्याट जीपीटीकै कुराकानीभित्रै आफ्नो गन्तव्यको यात्रा योजना बनाउन सक्नेछन् । यसमा निश्चित रुटको स्पष्ट मूल्य (कुनै लुकेका शुल्कबिना), वैकल्पिक रुटहरूको तुलना, यात्रा समय तथा गाडी आइपुग्ने अनुमानित समय जस्ता जानकारी प्राप्त गर्न सकिन्छ । साथै, प्रतीक्षा समय घटाउन उपयुक्त पिकअप स्थान छनोट गर्न पनि प्रणालीले सहयोग गर्ने जनाइएको छ । यात्रा योजना तय भएपछि प्रयोगकर्ताले अनुमानित भाडा याङ्गो एप वा वेब प्लेटफर्ममार्फत हेरेर सुरक्षित रूपमा बुकिङ प्रक्रिया पूरा गर्न सक्नेछन् ।
यो सुविधा विशेषगरी बारम्बार यात्रा गर्ने, पर्यटक तथा व्यावसायिक प्रयोगकर्ताका लागि उपयोगी हुने कम्पनीले जनाएको छ । च्याट जीपीटीभित्रै राइड–हेलिङ सुविधा समावेश भएपछि प्रयोगकर्ताले विभिन्न एपहरू परिवर्तन नगरी सजिलै आफ्नो दैनिक यात्रा व्यवस्थापन गर्न सक्नेछन् । याङ्गो राइडले यो प्रणाली वास्तविक समयको ट्राफिक डेटा र स्मार्ट रुटिङ प्रविधिमा आधारित रहेको बताएको छ, यसले सडक अवस्थाअनुसार यात्राको समय र लागतलाई निरन्तर अद्यावधिक गर्छ । कम्पनीले भविष्यमा च्याट जीपीटी एकीकरणलाई अझ विस्तार गर्दै डेलिभरी, सार्वजनिक यातायात तथा फूड डेलिभरी जस्ता सेवाहरू समेत समावेश गर्ने योजना बनाएको जनाएको छ ।
