काठमाडौं । ग्लोकल टिन हिरो २०२५ का आयोजक ग्लोकल प्रालिले यस वर्षको ग्लोकल २० अन्डर २० भनी पहिचान गरिएको आधिकारिक सूची सार्वजनिक गरेको छ ।
यस वर्षको छनोट नेपालभरका युवाहरूको असाधारण प्रतिभा, दूरदृष्टि र नेतृत्व क्षमता प्रदर्शन गर्ने उत्कृष्ट आवेदकहरूमध्येबाट गरिएको जनाइएको छ । किशोरकिशोरीहरुमा भएको प्रेरणा र उत्साहलाई प्रस्फुटन गरी उनीहरुले समाजमा गरेको प्रभावकारी कार्यलाई कदर र अरु माझ चिनाउने कार्यक्रम गोल्छा ग्रुप प्रस्तुत ग्लोकल टिन हिरो नेपालको यो ११औँ संस्करण हो । यस वर्ष सेप्टेम्बर १ तारिकका दिन अवार्ड कार्यक्रम र सम्मेलनमार्फत उनीहरु पुरस्कृत हुने भएका छन् । सोही दिन गोल्छा ग्रुप प्रस्तुत ग्लोकल टिन हिरो नेपाल विजेताको नाम पनि घोषणा गरिने जनाइएको छ ।
ग्लोकल टिन हिरो २०२५ को ११औँ संस्करणका लागि आवेदनहरू १३ देखि १९ वर्षका किशोरकिशोरीहरूका लागि खुला गरिएको थियो, जसले आफ्नो शैक्षिक कार्यभन्दा बाहिर गएर उल्लेखनीय काम र सकारात्मक प्रभाव पारेका थिए । जुलाई ३० मा आवेदन दिने अन्तिम म्यादपछि प्राप्त भएका सात सय ८६ आवेदनहरूको विस्तृत समीक्षा गरी २० जनाको नाम सार्वजनिक गरिएको हो । यस वर्षका सम्मानित व्यक्तिहरूलाई उनीहरूको विभिन्न क्षेत्रहरूमा गरेका कामहरूको लागि मान्यता दिइएको छ, जसमा प्रविधि, सामाजिक सक्रियता, उद्यमशीलता, वातावरणवाद, कला र स्वास्थ्य सक्रियता समावेश छन् । शीर्ष २० मा छानिएकाहरु अब ग्लोकल टिन हिरो २०२५ को अर्को चरणमा प्रवेश गरेका छन् । यस सम्मानित समूहबाट शीर्ष छ फाइनलिस्टहरूलाई अन्तिम चरणमा जानको लागि छनोट गरिनेछ ।
