काठमाडौं । नेपालएग्रो लघुवित्त वित्तीय संस्था लिमिटेडका नवनियुक्त अध्यक्ष रमेश कुमार कर्माचार्यले बैंक तथा वित्तीय संस्थासम्बन्धी ऐन, २०७३ को दफा १२७ बमोजिम पद तथा गोपनीयताको शपथ लिएका छन् । कर्माचार्य यही असार २१ गते सम्पन्न पाँचौ वार्षिक साधारणसभाबाट निर्विरोध निर्वाचित भएका थिए । वित्तीय संस्थाको सोही दिन बसेको सञ्चालक समितिको बैठकले सञ्चालक समितिको अध्यक्षमा कर्माचार्यलाई चयन गरको हो ।
संस्थामा निर्वाचित प्रत्येक सञ्चालकले आफू निर्वाचित वा मनोनित भएको मितिले बढीमा ३५ दिनभित्र बैंक तथा वित्तीय संस्थासम्बन्धी ऐन, २०७३ को दफा १२७ बमोजिम पद तथा गोपनीयताको शपथ लिइसक्नु पर्नेछ ।
काठमाडौँ उपत्यका बाहिर प्रधान कार्यालय रहेको वित्तीय संस्थाले सम्बन्धित क्षेत्र हेर्ने नेपाल राष्ट्र बैंक कार्यालयको निर्देशकसमक्ष पद तथा गोपनीयताको शपथ लिनुपर्ने व्यवस्था भएबमोजिम संस्थाको केन्द्रीय कार्यालय पोखरा–१८ कास्कीमा रहेकोले नवनिर्वाचित अध्यक्ष रमेश कुमार कर्माचार्यले नेपाल राष्ट्र बैंक पोखरा कार्यालयका निर्देशक ईश्वरी प्रसाद भट्टराई समक्ष पद तथा गोपनीयताको सपथ लिएको वित्तीय संस्थाका नि. प्रमुख कार्यकारी अधिकृत नयन देवकोटाले बताए ।
कार्यक्रमका अवसरमा नेपाल राष्ट्र बैंक पोखरा कार्यालयको निर्देशक ईश्वरी प्रसाद भट्टराईले नवनियुक्त कर्माचार्यलाई पुनः दोस्रो अध्यक्ष पदको कार्यकालको शुभकामना प्रदान गरेका थिए । कार्यक्रममा वित्तीय संस्थाले ग्राहकमैत्री कार्यक्रम लिएर वित्तीय पहुँच विस्तार हुन नसकेको स्वीकृत कार्यक्षेत्रमा कार्यक्रम विस्तारमा जोड दिन समेत आग्रह गरे ।
कार्यक्रममा नवनिर्वाचित अध्यक्ष कर्माचार्यले अध्यक्ष पदको कर्तव्य प्रचलित कानुन तथा नेपाल राष्ट्र बैंकको नियमन र निर्देशनको अधिनमा रही वित्तीय प्रणालीको सम्वद्र्धन तथा वित्तीय संस्थाको हितलाई सदैव ध्यानमा राखी आफ्नो कर्तव्य इमान्दारीका साथ पालना गर्ने बताए । साथै, नेपाल एग्रो लघुवित्त वित्तीय संस्था इन्फिनिटी लघुवित्तवित्तीय संस्थासँग प्राप्तिमा जानको लागि नेपाल राष्ट्र बैंकबाट अन्तिम स्वीकृतिको पर्खाइमा रहेको समेत बताए ।
